Die tafeldruif-oes vorder tans goed. ’n Oes van sowat 5% groter as dié van 2010 word verwag, sê die Tafeldruifvereniging.
Mnr. Johan van Niekerk, hoof uitvoerende beampte, sê dié oes is groter omdat die oorstromings einde 2010 en begin verlede jaar ’n kleiner as normale oes in die vorige seisoen tot gevolg gehad het.
“Ons is nou sowat ’n derde in die oestyd in, met sowat 17 miljoen kartonne wat al verpak is. Die mid-seisoen is nou op dreef en ons sal dié seisoen na verwagting sowat 50 miljoen kartonhouers pak,” verduidelik Van Niekerk. Die tafeldruifseisoen eindig in April.
Van Niekerk sê die Oranjerivier-omgewing se oestyd is amper verby, en ten spyte van die oorstromings en probleme wat dié boere ervaar het, lyk die oes goed.
Europa
Die bedryf se uitvoer na Europa ondervind tans nie druk weens die ekonomiese krisis in dié wêrelddeel nie. Van Niekerk sê hy is tevrede met die beweging van uitvoer na die vasteland se markte.
“Ons uitvoer na Europa verloop normaal en volgens beplanning. ’n Resessie was in ’n mate nog altyd vir ons bedryf goed gewees,” aldus Van Niekerk.
Hy sê weens die neiging dat mense in Europa tydens ’n resessie hulself so gesond moontlik wil hou sodat hulle hul werk kan behou, neem die verbruik van vrugte toe. “Mense koop nou meer by supermarkte en gaan eet minder in restaurante, wat ons ook bevoordeel.”
10 Januarie 2012
