'n Woordestryd heers tussen mnr. Athol Trollip, leier van die DA in die Oos-Kaap en mnr. Mlibo Qoboshiyane, LUR vir landelike ontwikkeling en landelike hervorming in die provinsie, nadat die DA sy bevindinge bekend gemaak het van ’n besoek aan die Magwa- en Majola-teeplantasies in die voormalige Transkei.
Trollip, wat deur ander DA-leiers vergesel was, het na afloop van die besoek gesê hulle was geskok om te sien dat geen tee nog sedert die aanvang van die seisoen in September geoes is nie – ondanks ’n herkapitalisasieplan van R200 miljoen.
“Ons het oorgroeide plantasies wat nie bemes is nie, teëgekom. Dit is veral by Magwa wat toestande haglik is.
"Op al twee die landgoedere het die bestuur en werkers gesê dat hulle vir maande geen vergoeding ontvang het nie en laas net voor die verkiesing betaal was vir werk. Die maand se salaris wat hulle wel in Desember ontvang het, klink toegeeflik maar is eintlik ’n klap in die gesig van mense wat wil werk om ’n bestaan te voer.”
Trollip het die teeplantasies as ’n nasionale bate bestempel wat baie strategies geleë is om broodnodige werksgeleenthede aan armes in afgeleë gemeenskappe te verskaf.
In sy reaksie het die kantoor van Qoboshiyane die DA van die verspreiding van vals inligting beskuldig. “In Januarie vanjaar is R3,1 miljoen aan die plantasies oorbetaal vir salarisse en R264 896 aan SARS om die belasting skuld te delg wat gelei het tot die bevriesing van die teeplantasies se bankrekening.”
Volgens die skrywe het al die rolspelers ingestem om hulle gewig agter ’n reddingsplan vir die plantasies te gooi. “As regering is ons fokus om aandag aan die bestuurs- ’n administratiewe probleme daar te skenk en te verseker dat tot volle produksie (ook in die werkers se belang) oorgegaan kan word."
