Renosterstropery is weer in die kollig ná nóg ’n renosterstroper vasgetrek en deur ’n groep spoorsnyers geskiet is.
Luidens ’n berig in Beeld (28 September 2011) is die stroper aangekeer ná hy 16 uur lank deur boere, die polisie en spoorsnyers agtervolg is.
Die man is opgespoor ná die groep sy bloedspoor deur die veld op ’n plaas in die distrik Thabazimbi gevolg het.
Die verdagte het homself glo Maandagaand (26 September 2011) trompop in ’n groep spoorsnyers op ’n buurplaas vasgeloop. Hy het ’n vuurwapen op die spoorsnyers gerig en hy is in die been geskiet. Hy het op die vlug geslaan, maar plaaswerkers het later sy bloedspoor opgemerk en die polisie is in kennis gestel.
’n Skuiling
Die verdagte het glo saam met nóg ’n stroper in ’n skuiling gewoon op die plaas waar hy aangekeer is. Vanuit die skuiling kon hulle vermoedelik die renosters op die plaas goed dophou.
Die mans het glo nog nie ’n renoster op dié plaas doodgemaak nie, maar hulle kan vermoedelik met ’n renostersindikaat, wat tans in die Brits-omgewing aktief is, verbind word.
Die man word tans onder polisiebewaking in ’n hospitaal op Thabazimbi behandel.
Ooreenkoms
Intussen bespreek die departement van omgewingsake en waterwese en die Viëtnamese regering Woensdag (28 September 2011) in Johannesburg ’n samewerkingsooreenkoms om smokkelhandel in renosterhoring te beveg.
Kwessies oor die doodmaak van die diere en die algemene bewaring van die natuur is ook op die agenda. ’n Voorlopige samewerkingsooreenkoms is opgestel ná die twee partye vroeër ingestem het dat dit gedoen moet word.
Bron: Beeld
28 September 2011
