Suid-Afrika het die gesogte trofee vir witwynmaker van die jaar vir 2010 by die International Wine Challenge (IWC) in Londen gewen en daarmee die land se reputasie gestand gedoen as ? witwynprodusent van wêreldgehalte.
Die toekenning is gemaak aan mnr. Callie van Niekerk, Distell se groepsbestuurder van wyne, en onderstreep dié produsent se vermoë om waarde oor ? verskeidenheid van handelsmerke en wynstyle te lewer.
Uit die agt Suid-Afrikaanse witwyne wat vanjaar goue medaljes by die skou gewen het, was vyf uit Distell se portefeulje. Hulle is die 2009 Nederburg Winemaker’s Reserve Noble Late Harvest, wat ook die IWC-trofee vir die beste Wes-Kaapse botritis-wyn ontvang het; drie Fleur du Cap-wyne: sowel die 2008- as die 2009-oesjaar van sy Noble Late Harvest, en dié handelsmerk se Unfiltered Semillon van 2009; en die 2009 Lomond Pincushion Sauvignon Blanc.
Die verowering van die trofee plaas Distell in die geselskap van die vervaardiger van sjampanje, Champagnes P&C Heidsieck, wat die toekenning as vonkelwynmaker van die jaar ontvang het, en die Franse maatskappy Domaine De La Vougeraie, wat as rooiwynmaker van die jaar aangewys is.
Die paneel, wat alle inskrywings blind geproe het, het sowat 10 000 wyne geproe voor hulle die wenners van die trofeë aangewys het.
Van Niekerk het namens sy wynmaakspan gesê Suid-Afrika verbaas en verheug wynbeoordelaars in die wêreld met die uitnemendheid van wat die land bied.
“Distell se prestasie is nie net vir ons maatskappy en die betrokke handelsmerke ’n oorwinning nie, maar ook vir die land. In die huidige baie stram wêreldwye ekonomiese omgewing kom dit op ’n baie geleë tyd, want die wynhandel en verbruikers soek orals gehalte as ’n mededingingsfaktor wat ’n verskil maak.”
Van Niekerk het gesê die drie handelsmerke van die maatskappy wat by vanjaar se IWC erkenning gekry het is al drie gereelde pryswenners. “Nederburg is die Suid-Afrikaanse wynmakery met die meeste pryse, en Fleur du Cap verhoog gedurig sy status danksy indrukwekkende vertonings by binne- en buitelandse kompetisies. Lomond, naby Gansbaai, is ’n betreklik nuwe deelnemer, maar het sedert sy debuut in 2005 reeds verskeie glanstoekennings in sy sak te steek.”
Die volgende Suid-Afrikaanse wyne het by die 2010 IWC goue medaljes gekry:
Wit
Fleur Du Cap Noble Late Harvest 2008
Fleur Du Cap Noble Late Harvest 2009
Fleur Du Cap Unfiltered Semillon 2009
Klein Constantia Vin De Constance 2005
Lomond Pincushion Single Vineyard Sauvignon Blanc 2009
Nederburg Winemaker’s Reserve Noble Late Harvest 2009 Wes-Kaapse Botritistrofee)
Oak Valley Chardonnay 2009 (Suid-Afrikaanse Witwyntrofee)
Stellar Organics Heaven On Earth NV
Rooi
Dunstone Shiraz 2008
Vrede en Lust Boet Erasmus 2007 (Suid-Afrikaanse Rooiwyntrofee)
13 September 2010
