Al neem Suider-Afrika se landbouproduksie toe, is hierdie streek nie naastenby só suksesvol soos Brasilië en Indië as dit kom by die uitwissing van hongersnood nie, het mnr. Langa Zita, direkteur-generaal van die Departement van Landbou, Bosbou en Visserye, gesê.
Die Departement van Landbou, Bosbou en Vissery en die Verenigde Nasies Voedsel- en Landbou-organisasie (FAO) het Wêreldvoedseldag by die Reserwebank se konferensiesentrum in Pretoria gevier.
“Die Suider-Afrikaanse Ontwikkelingsgemeenskap (SAOG) se voedselsekerheidsituasie vir die 2008/’09 bemarkingsjaar was oor die algemeen aanvaarbaar gewees danksy goeie reënval en beter produksiemiddele wat gebruik is,” sê Zita.
Die streek se algehele graantekort het van 3,68 miljoen ton in die 2007/’08 bemarkingsjaar tot ‘n tekort van 1,6 miljoen ton in die 2008/’09 bemarkingsjaar gedaal. Die streek is steeds ‘n netto invoerder van melk en vleis (bees, bok, skaap, pluimvee en vark), maar statistiek dui daarop dat die produksie van vleis, eiers en melk in 2008 met onderskeidelik 4,2%, 1,8% en 2,2% hoër as in 2007 was, sê Zita.
18 Oktober 2010
