Dr. Thomas Funke, uitvoerende hoof van die SA Suikerrietkwekers-bedryfsorganisasie, sê suikerrietkwekers verwelkom dié reën. Die wydverspreide, deurdringende reën van Maart en veral April het opgemaak vir die ietwat droër Februarie wat die meeste van hierdie produsente beleef het.
“Die reën het die vooruitsigte vir suikerrietprodusente verander met ’n goeie oes wat nou verwag word. Hierdie gunstige oesverwagting wek egter ’n mate van kommer oor die vermoë van sommige suikermeulens om die hele oes vanjaar te verwerk. Daar is ook ’n mate van kommer in die besproeiingstreke van Mpumalanga en Noord-Zoeloeland dat die oes effens laer kan wees as wat verwag is aangesien die minder aantal sonskyndae in die somer opbrengste kan beïnvloed,” sê Funke.
Me. Chloe Jenkins, ’n droëlandsuikerrietkweker in die distrik Harding, sê dit gaan interessant wees om te sien hoe suikermeulens vanjaar suikerriet wat van verlede jaar oorgedra is, en die goeie oeste wat verwag word, gaan verwerk.
Landbouweekblad het vroeër berig kwessies met kapasiteit by verskeie suikermeulens in Suid-Afrika het daartoe gelei dat meer as 1 miljoen ton suikerriet nie in 2021 verwerk is nie. Dit het die inkomste van die betrokke produsente nadelig beïnvloed. Hul suikerriet wat eers vanjaar verwerk sal word, kan van swakker gehalte wees en sodoende minder gunstige verhaalbare waardes – waarvoor suikerrietboere betaal word – bereik.
“Die goeie reën is ’n bietjie van ’n tweesnydende swaard, want dit help met goeie groei, maar kan ook laer suiker in die suikerriet tot gevolg hê. Ons hoop dat die komende droër wintermaande sal help om ’n balans tussen goeie groei en goeie suikerinhoud te kry,” sê Jenkins.
Mnr. Phenias Gumede, koördineerder van die boereforum van die Makhathini-besproeiingskema in die noorde van Zoeloeland, sê die reën was ’n seën en ’n probleem vir die kwekers – waarvan die meeste op klein skaal is – in sy distrik wat hul suikerriet besproei. Die nat toestande het dit moeilik gemaak vir voertuie, veral vragmotors, om na en van suikerrietlande te kom.
Die gehalte van suikerriet se suiker neem af in die tydperk tussen die sny en verwerking van ’n oes. Dus is enige vertragings tussen hierdie twee prosesse ongunstig.
“Nat toestande in die landerye maak dit moeilik om die onkruid wat weens die reën sterk groei, aan te pak,” sê Gumede. “Die reën sal egter die groei van die jonger suikerriet bevoordeel namate ons in die droër wintermaande inbeweeg. Ons suikerrietkwekers moet net die onkruid onder beheer kan hou.”
