Sowat R100 miljoen is beskikbaar gemaak vir hulp aan opkomende boere in KwaZulu-Natal wat nie die mas opkom nie, sê die provinsiale regering.
Luidens ‘n berig op Fin24.com het die provinsiale regering die Landbou Sake-ontwikkelingsagentskap op die been gebring om hulp te verleen aan boere wat grond deur middel van die grondhervormingsprogram ontvang het.
Die agentskap is in Vryheid bekend gestel. Mnr. Mike Mabuyakhulu, die LUR vir ekonomiese ontwikkeling, sê die agentskap is gestig nadat dit duidelik geword het dat die meeste van die boere wat grond só ontvang het, sukkel om te oorleef.
Grond ter waarde van R3 miljard
Volgens Mabuyakhulu is grond ter waarde van sowat R3 miljard sedert 1994 aan opkomende boere in die provinsie oorgedra.
Die agentskap sal die boere ook help om toegang tot markte te kry. Die agentskap, waarby verskeie landboukundiges betrokke is, is ‘n vennootskap tussen die departemente van ekonomiese ontwikkeling en landbou en omgewingsake en landelike ontwikkeling. Die Departement van Ekonomiese Ontwikkeling sal ‘n bedrag van R27 miljoen gee om 87 boere by te staan.
Bron: Fin24.com
30 November 2010
