Die besoedeling van Carolina se drinkwater deur suur mynwater is slegs die begin van ’n kettingreaksie waarteen gewaarsku is, sê Mpumalanga Landbou.
“Dit is slegs die begin van ’n kettingreaksie. Ek wil nie sinies klink nie, maar dis nou te laat, die staat sal dit nie self kan stuit nie,” aldus mnr. Koot Claasen, voorsitter.
Claassen sê ná die voorval meen hy dat suur mynwater al hoe meer op verskillende plekke gaan begin uitsyfer. “Ons waarsku al baie jare lank dat die Regering iets moet doen, want rehabilitasie word nie reg gedoen nie, maar niemand slaan ag daarop nie. ’n Mens weet nie of die staat nou regtig iets gaan of kan doen nie.”
Luidens ’n berig op News24.com het die krisis in Carolina die afgelope naweek ontstaan.
Vinnige reaksiespan
Mnr. Themba Khumalo, woordvoerder vir die Departement van Waterwese, sê hulle is uiters bekommerd oor die situasie. Die departement het ’n reaksiespan, wat uit ingenieurs en wetenskaplikes bestaan, aangestel om die owerheid te help om swaar metale uit die drinkwater te verwyder.
Amptenare van die Chief Albert Luthuli plaaslike munisipaliteit gooi tans daagliks dosyne sakke kalk in die dorp se drinkwater in ’n poging om die pH-vlakke te herstel. Die grootste probleem is om aluminium uit die water te verwyder. Die water is steeds nie geskik vir menslike gebruik nie.
Drinkwater vir die dorp word tans van Breyten en Chrissiesmeer af aangery.
Bron: News24
22 Februarie 2012
