Die binneland en Noord- en Suidkus van KwaZulu-Natal is die hardste deur die onlangse gure weer getref, sê me. Sandy la Marque, uitvoerende hoof van die KwaZulu-Natalse landbou-unie (Kwanalu).
Infrastruktuur is op groot skaal verwoes, veral paaie en brûe om Durbanhawe, en die beweging van goedere is baie beperk. Die toegang tot die aflaai- en optelpunte sal volgens haar ’n impak op die landbousektor hê, terwyl daar reeds kommer bestaan oor die toestand van Suid-Afrika se padnetwerk in landelike gebiede en die impak daarvan op voedselsekerheid, die landbousektor en ekonomiese groei.
“Sonder goeie infrastruktuur en basiese dienslewering sal die impak ernstig wees op groei en indiensneming, investering en uitvoergeleenthede belemmer. Die jongste ramp in KwaZulu-Natal bewys weer hoe vatbaar die landbousektor is en hoe belangrik die identifikasie en prioritisering van voorkomende maatreëls, onderhoud, ekonomiese nodes en deurgange is. Hierdie ekonomiese deurgange kan regdeur die provinsie gevind word.”
Daadwerklike optrede om KwaZulu-Natal se infrastruktuur te herstel en te onderhou is volgens La Marque ’n prioriteit wat selfs meer pertinent vir die landbousektor word.
Durbanhawe
Volgens Transnet-haweterminale (TPT) is terminale by Durbanhawe in bedryf, maar hulpbronne is beperk. Transnet se ingenieursonderhoudspan het sy ondersoek na die skade voltooi en begin met geringe werk wat deur sommige masjinerie benodig word.
TPT konsentreer nou op herstel en sal alles moontlik doen om vertragings te minimaliseer en doeltreffendheid by die hawe te verbeter.
Mnr. Hannes de Waal, voorsitter van die Suid-Afrikaanse Sitruskwekersvereniging (SKV), sê voertuie wat vir Bayhead bestem was, moet eerder van Solomon Mahlangu-, Bluff- en Iranweg gebruik. Hierdie roete is egter nie geskik vir die hoeveelheid vragmotors wat gewoonlik Bayheadweg gebruik nie.
“Erge opeenhopings is onvermydelik. Daar is tans geen aanduiding van wanneer die tydelike of permanente herstel van Bayheadweg afgehandel sal wees nie.”
De Waal sê terwyl daar plek in die koue-opbergingsgeriewe by die Durbanhawe is, kan vrugte daarheen gestuur word, maar die vrugte sal na verwagting ’n tyd in die hawe staan. Daar is geen aanduiding van wanneer vragmotors weer soos normaalweg sal beweeg nie.
Aangesien ’n aantal verkoelde vraghouers weens die gure weer en gevolglike vloede beskadig is, waarsku hy dat die beskikbaarheid van vragmotors waarskynlik vir die grootste gedeelte van die seisoen ’n kwessie sal wees.
