Daar word nog nie veel melding van graandiefstal in die noordelike gedeeltes van die Vrystaat gemaak nie, maar aangesien daar tans gestroop word, sal boere binnekort kan vasstel watter verliese hulle as gevolg daarvan ly, sê dr. Jane Buys, veiligheidsrisiko-analis by Vrystaat Landbou.
Daar is egter volgens haar in die omgewing van Bothaville en Vierfontein voorvalle waar droë mielies van die lande gesteel word. Die diewe kan glo tot 20 sakke van die droë mieliekoppe op ’n slag bymekaar maak. Sy sê verdagtes is al in verband met dié voorvalle op aanklagte van betreding en diefstal in hegtenis geneem.
Dan was daar ook volgens haar ’n voorval by Heuningspruit waar ’n groep van 15 gewapende persone ’n vragmotor met ’n sleepwa gebruik het om 20-30 ton soja van ’n graandam af te skep. ’n Vragmotor wat soja vervoer het, is ook volgens haar in Potchefstroom gekaap.
Sy meen daar word op soja gekonsentreer omdat pryse daarvoor tans goed is.
Buys sê van die veiligheidsverteenwoordigers in die noordelike gedeeltes van die Vrystaat meen die swak toestand van Vrystaatse paaie dien as belemmering vir dié tipe van misdaad en daarom vind dit nie tans op groot skaal plaas nie.
Boere moet egter volgens haar steeds bewus daarvan wees aangesien dit vinnig kan toeneem en boonop ’n groot veiligheidsrisiko inhou omdat die persone wat by graan- en mieliediefstal betrokke is, gewoonlik gewapen is en in groot hoeveelhede gedurende die nag op plase toeslaan.
“Boere moet verseker dat hulle moontlik ’n veiligheidswag of kameratoerusting plaas naby die graandamme, vragmotors en trekkers wat gedurende die nag op lande staan sodat hul produkte, werktuie en toerusting nie gesteel word nie.”
