“Om vir die tabakbedryf te baklei, is soos om water opdraande te stoot.” So sê mnr. Francois van der Merwe, voorsitter van die Tabakinstituut van Suidelike Afrika oor die aanslae van onder meer gesondheidsorganisasies op die tabakbedryf.
Hy het by ’n boeredag van die Waterberg Tabakstudiegroep naby Vaalwater in Limpopo gepraat oor die uitdagings wat die tabakbedryf in die gesig staar. Van der Merwe, wat ook die voorsitter van die Internasionale Tabak-kwekersvereniging is, sê die agenda rondom tabakregulasies wêreldwyd word deur die Verenigde Nasies se Wêreldgesondheidsorganisasie (WGO) vasgestel.
“Dít is waar ons moeilikheid begin. Dis oor denkrigtings wat in Geneva opgekook word wat ons bedryf as ’n slegte een met slegte mense sien, oordeel en kruisig.” Van der Merwe sê plaaslike tabakboere is uitgelwer aan regulasies en beleidsrigtings wat deur die WGO daargestel word omdat die Suid-Afrikaanse Regering, na sy mening, aldurig witvoetjie soek by die internasionale gemeenskap.
“Hoekom anders sal ons Minister van Gesondheid tydens ’n debat op ’n nasionale radiostasie vir my sê daar is niks goeds aan die tabakbedryf nie, en dat dit geen positiewe bydrae tot die samelewing maak nie.” Van der Merwe sê dit stem ooreen met die WGO se beleid om die tabakbedryf te reguleer tot op die punt waar daar eintlik geen bedryf, geen aanvraag en geen gebruik in die wêreld oor is nie. “So ons stryd lê eintlik internasionlaal.”
Hy het boere daarop gewys dat hulle hul bedryf en die regulasies wat dit rig moet ken. “Ons kan nie kortpaaie vat nie. Omdat ons onder die vergrootglas is en omdat ons gebrandmerk is deur gesondheidsorganisasies word enige fout in die tabakbedryf uit proporsie geblaas regoor die wêreld.” Hy het spesifiek verwys na toelaatbare chemikalië in die verbouing van tabak.Van der Merwe het ook daarop gewys dat Suid-Afrikaners moet kennis neem van die enorme bydrae wat tabak tot die staatskoffers deur belasting maak. Hy sê tabak verskaf ook werk aan duisende mense op plase en in fabrieke en belê voortdurend groot bedrae geld in die land.
Hy sê die bedryf ontken nie die gesondheidsrisiko’s verbonde aan die gebruik van tabakprodukte nie, maar dat die verbouing van tabak, ’n wettige bedryf is en dat boere tabak plant omdat hulle ’n goeie produk in ’n stabiele mark kan lewer. “Mense gaan in elk geval rook en as ons tabak nie binne ’n wettige en goed gereguleerde raamwerk produseer nie, gaan dit onwettig en sonder enige gehaltebeheer geproduseer word.”
