As die regering aanhou misluk om die wydverspreide, florerende handel in onwettige tabakprodukte hok te slaan, staan die wettige nasionale tabakwaardeketting aan die vooraand van nog ’n bedreigende jaar.
Produksiestatistieke verskaf deur Limpopo-tabakverwerkers (LTV), die enigste verskaffer van berookte Virginia-tabakblare aan binnelandse kopers in Suid-Afrika, toon ’n voortgesette afwaartse neiging in sy boere-verskaffers se hektare onder tabak sedert 2012.
Mnr. Zacharia Motsumi, woordvoerder van die Suid-Afrikaanse tabaktransformasie-alliansie (SATTA), sê die verkoop van wettige tabakprodukte het aansienlik afgeneem tydens en sedert die regering se vyf maande lange verkoopverbod in die streng covid-19-inperkings in 2020.
