Slaan toe op die onwettige vervaardiging van tabakprodukte om boere en die groter tabakwaardeketting te beskerm én waardevolle rande vir die staatskoffer in te win.
Mnr. Francois van der Merwe, voorsitter van die Tabakinstituut van Suider-Afrika (Tisa), rig die versoek aan die Regering en sê vervaardigers wat hou by belastingwette rondom tabakprodukte, verloor inkomste en markaandeel teenoor vervaardigers wat die belasting op tabakprodukte ontduik.
Tisa se navorsing wys dat 22% van die plaaslike sigaretmark aan onwettige vervaardigers "behoort", wat die Staat R4 miljard tot R5 miljard jaarliks kos. Oor die afgelope vyf jaar het die staat meer as R25 miljard verloor, wat ver kan gaan om belastingtekorte te verklein. Van der Merwe sê aangesien wettige vervaardigers tabak by plaaslike boere koop, beïnvloed hul verlore markaandeel ook die hoeveelheid tabak wat boere van die hand kan sit.
Meer geld vir Jan Taks
Die aksynsbelasting op 'n pakkie van 20 sigarette is tydens die Begrotingsrede opgeskuif met 'n bo-inflasie 8% tot R14,30 (BTW uitgesluit). Dit, tesame met BTW, verteenwoordig 52% van 'n pakkie sigarette se prys.
Van der Merwe sê Tisa aanvaar dié vlakke van belasting op tabakprodukte maar vra die Regering om sy deel te doen om toe te sien dat die speelvlak gelyk is en almal belasting betaal.
"Enige verhoging in belasting skep die geleentheid vir belastingontduiking. Sodra belasting verhoog word, probeer sommige spelers om dit te ontduik. Ons vra vir beter beheer oor vervaardigers se produksie."
Van der Merwe sê tegnologie is beskikbaar wat dit moontlik maak om sigarette by die punt van vervaardiging by SARS te registreer. Sodoende sal onwettige vervaardigers nie in staat wees om slegs 'n deel van hul produksie te verklaar nie.
"Dit is belangrik om só die waardeketting te beskerm sodat boere en wettige vervaardigers kan belê in die tabakbedryf en die groter ekonomie," sê Van der Merwe.
