Tabakboere het die afgelope jaar darem oeste gehad en min of meer deurgekom, sê mnr. Francois van der Merwe, voorsitter van die SA Tabakinstituut, TISA.
Hy sê die droogte het egter sy tol geëis en baie van die damme en riviere waaruit boere besproei, het opgedroog en omdat ál Suid-Afrika se tabak onder besproeiing verbou word, het dit 'n ongunstige impak op die kwaliteit van die blare gehad.
"Hoewel tabak 'n geharde plant is, moet dit op die regte tye water kry anders verdik die selwande en dit affekteer die gehalte van die blaar wat op sy beurt weer die pr rook kwaliteit en prys aan die produsent affekteer," sê Van der Merwe.
Hierdie uitdagings ten spyt, sê hy omtrent al die land se tabakprodusente gaan voort en hoewel daar 'n effense afname is in die hektare wat vir die 2017-oes geplant word, verwag Tisa dat weer 'n oes van tussen 14 en 15 miljoen kilogram gelewer kan word. Hiervan sal omtrent 10,2 miljoen kilogram oonddroog tabak wees en nagenoeg vier miljoen kilogram lugdroog tabak. Boere kan ook uitsien na 'n prysverhoging van byna 12%.
