’n Verhoging in die gesondheidsbevordingsheffing op suikerversoete drankies kan die afwaartse trajek van die suikerbedryf sedert 2005 verder verhaas, waarsku ’n verslag van die buro vir voedsel- en landboubeleid (BFAP) wat kort voor mnr. Enoch Godongwana, minister van finansies, se begrotingsrede uitgereik is.
Die navorsing is in opdrag van die Suid-Afrikaanse suikervereniging (SASV) gedoen. Die verslag, “Potential impact of an increase in the current level of the health promotion levy”, wys daarop dat Suid-Afrika van 2005 tot 2015 sowat 14,6% van sy suikerrietaanplantings verloor het weens mededinging van suiker wat plaaslik gestort is en moeilike ekonomiese toestande.
Van toe tot 2018 was die suikerrietaanplantings relatief stabiel op nagenoeg 350 000 ha tot 360 000 ha. Sedert die suikerbelasting in 2018 ingestel is, het die bedryf ’n verdere 10 900 ha suikerrietaanplantings verloor.
