Heelwat suikerrietboere is in finansiële moeilikheid weens die afgelope seisoen se droogte, sê mnr. David Wayne, uitvoerende direkteur van Canegrowers, suikerrietprodusente se verteenwoordigende organisasie.
Met die aanvang van die seisoen was die bedryf opgewonde om voort te bou op wat Wayne tóé as ’n herstelfase beskryf het.
“Die laatsomer aan die begin van die jaar was ongelukkig baie droog en daar het ook maar weinig winterreën aan die kus geval, wat ongewoon is. Daarbenewens het stakings ál die suikermeulens, buiten die UCL-meule in Dalton, se deure vir twee weke laat sluit. Ryp in die middellande het ook ’n ongunstige uitwerking op produksie gehad, maar die grootste verliese weens ryp sal eers volgende jaar gevoel word,” sê Wayne.
Die goeie lopie wat die bedryf in 2013 beleef het, was dus van korte duur, maar Wayne meen alles is nie verlore nie. “Die vooruitsig op die finale herwinbare waarde vir die afgelope seisoen staan tans op R3 435/ton. Hierdie is bykans 'n 10 persent verhoging op dié van die 2013-seisoen, en is toe te skryf aan minder invoer asook beter gehalte suikerriet wat hierdie seisoen geproduseer is.”
Nogtans bestaan groot rede tot kommer. “Ons is besig om die omvang van die ekonomiese en sosiale uitwerking van die droogte in al ons produksiegebiede te bepaal. Dit raak baie moeilik vir boere met ’n gebrekkige kontantvloei om goeie hergroei-bestuur toe te pas wat weer uitloop op ’n swakker oes in die komende seisoen,” verduidelik Wayne.
