Sonder enige hulp van die Regering, sonder enige subsidies of handelsbeskerming en ten spyte van stukkende paaie en patetiese plaaslike regering, het Suid-Afrikaanse boere daaring geslaag om produktiwiteit met 'n derde te laat verbeter oor die laaste 20 jaar.
Daarvoor verdien hulle applous, het die bekende analis van politieke en ekonomiese neigings, mnr. JP Landman, by die Subtrop-simposium in Witrivier gesê.
Suid-Afrika mag 'n ontwikkelende land wees, maar anders as in Indië en China, tel Suid-Afrikaanse boere onder die wêreld se bestes. Daarom sê Landman is dit nie moontlik vir die plaaslike landbousektor om soos in daardie twee lande tussen 60% en 80% van die arbeidsmag werk te gee nie. "Ons is verby daardie punt, en selfs die Regering weet dit."
Hy sê die gemiddelde plaas in China is 2 ha groot en word deur bestaansboere bewerk. Ethiopiese grondhervorming, wat eienaarskap tot 50 ha per persoon beperk het, het wel gesorg dat baie mense werk het, maar niemand kan genoeg produseer om surplusse te verkoop nie.
Hy sê arbeidsprobleme moenie ten koste van ekonomiese groei aangespreek word nie. Hy voorspel dat Suid-Afrika se ekonomie vir die volgende twee tot drie jaar gaan aankruie soos dit tans doen.
"Daar is geen wonderwerke in die vooruitsig nie," sê hy, maar voeg by dat daar darem ook nie 'n ineenstorting verwag word nie.
