As Suid-Afrika te min mielies produseer, sal plaaslike melkboere minder mededingend wees, sê dr. Ferdi Meyer, senior landbou-ekonoom van die Universiteit van Pretoria.
“Suid-Afrikaanse melkplase het veral vanaf 2001 doeltreffend geword. Hoewel produksie tot 2019 nie so vinnig sal verhoog soos in die vorige dekade nie, behoort dit steeds te groei. Doeltreffendheid sal ook toeneem, hoewel dit nie so vinnig soos in die verlede sal styg nie,” het Meyer op die Melkprodusente-organisasie se kongres gesê.
Meyer het die doeltreffendheid van melkplase bepaal deur die hoeveelheid melk wat geproduseer word deur die aantal melkbeeste op die plaas te deel.
Volgens vooruitskouings wil dit voorkom of daar wel ruimte is om steeds die melkmark uit te brei. Wat verwerkte produkte betref, hang dit egter af van die produk.
Duurder suiwelprodukte
Meyer meen dat die prys van kaas oor die volgende paar jaar met 24% sal styg, terwyl afgeroomde melkpoeier 49% duurder sal word en volroommelkpoeier 59% duurder. “Invoer speel ’n al hoe groter rol ten opsigte van die prys van verwerkte melkprodukte.”
Buiten dat die suiwelmark baie mededingend geword het, het Suid-Afrikaanse melkplase baie groot geword om skaal-ekonomie te bewerkstellig. Meyer sê daar is tien faktore waaraan ’n melkboer sy mededingendheid kan meet.
Dit is die tempo van produksie, die beheer van uitgawes, die doeltreffendheid waarmee kapitaal aangewend word, winsgewendheid, likiditeit, terugbetaalskedule, solvabiliteit, die doel van die melkery, die behoud van lewenstandaard en die motivering van die plaaswerkers.
6 September 2010
