Die ontwikkeling is strategies langs die N4-hoofweg, naby die Cullinan/Rayton-afrit, in Gauteng. Die sooispitseremonie is deur verteenwoordigers van Terugploeg se stigterorganisasies, Atterbury-trust, Vibro Bricks en WeBuyCars, asook ’n aantal donateurs, boere en bouspanne, bygewoon.
Mnr. Lood Bester, ’n medestigter van Terugploeg, sê die idee vir die Terugploeg-organisasie het tydens die grendeltyd ontstaan. “ ’n Groeiende kosnood is in sekere Afrikaanssprekende gemeenskappe opgemerk. Hierdie hulpbehoewendes het geen ondersteuning uit amptelike bronne ontvang nie.”
Bester sê hulle het uit die staanspoor besluit “dit is beter om mense eerder te leer brei as om vir hulle net truie af te lewer.” Van hier die idee om die ontwikkeling te begin. Benewens die kosverwerkingsaanleg en verkoelingsgeriewe, word ’n groente- en vrugtetuin, asook ’n klerebank beplan. Daar sal ook ’n vertrek wees waar opleiding of motiveringspraatjies aangebied kan word.
Bester wil ook braaihout daar laat sny en verpak vir verkoop. “Al hierdie take het arbeid nodig: om die tuine te versorg, die kos te verwerk, die klere wat ons inkry, te sorteer, was en stryk, die vragte hout te verpak in braaipakke . . . Dit is ’n lang lys. Só skep ons dus ook werksgeleenthede vir die mense uit die gemeenskappe wat ons bedien.”
Die Terugploeg-projek is in November 2020 bekend gestel en Bester sê hulle is oorweldig deur al die ondersteuning wat reeds aangebied is. Boere van Gauteng, Mpumalanga en Limpopo het reeds vragte groente en vrugte, asook wildsvleis geskenk. Die idee is, onder meer, om die kos by dié ontwikkeling te verwerk en op ’n gereelde basis aan mense in en om Pretoria uit te deel.
Mnre.
Faan en Dirk van der Walt, stigters van WeBuyCars, het ook hul ondersteuning
gebied toe daar besef is dat Terugploeg ’n “hoofkantoor” gaan nodig hê.
Mnr. Dirk van der Walt sê hy het nie vir ’n oomblik getwyfel om by hierdie projek betrokke te raak nie. “Ons het ’n suksesvolle en geseënde besigheid en wil betrokke by ons gemeenskappe raak om mense in nood te ondersteun. Armoede is op enige gegewe oomblik baie nader aan jou as wat jy dink.”
WeBuyCars het 8 ha in die ooste van Pretoria vir die ontwikkeling aan Terugploeg beskikbaar gestel.
"Die amptelike planne vir die ontwikkeling is vroeg in Desember ingedien by die plaaslike munisipaliteit. Sodra ons goedkeuring kry, begin ons met die bou daarvan. Ek dink die bouery behoort drie tot vier maande te duur. Ons beoog om die ontwikkeling teen 1 Julie 2021 te open,” sê Bester.
Kontak vir Lood Bester of Jani Doms by lood@terugploeg.co.za of jani@atterbury.co.za vir nog inligting oor Terugploeg.
