‘n Saak waar me. Tina Joemat-Pettersson, Minister van Landbou, Bosbou en Visserye glo ‘n hofbevinding geïgnoreer het, is Vrydag (14 Januarie) buite die hof geskik.
Luidens ‘n berig op Business Day (17 Januarie) het dít gevolg na Joemat-Pettersson glo nie ‘n hofbevel eerbiedig het om drie permitte, waarvoor ‘n perlemoenhandelaar aansoek gedoen het, aan hom toe te staan nie.
Mnr. Scott Russell, ‘n lid van die Suid-Afrikaanse Perlemoenbedryfsvereniging is ‘n hofbevel toegestaan deur die Wes-Kaapse Hooggeregshof waarvolgens die minister drie permitte teen Woensdag, 5 Januarie 2011, aan hom moes toestaan.
Permitte dieselfde dag
Ná die minister glo nie die bevel nagekom het nie, het Russell en die Feike Natuurlike Hulpbronbestuursraadgewers, waarvan hy ook ‘n lid is - op 5 Januarie ‘n aansoek teen die minister gebring.
Russell se permitte is dié middag uitgereik, en voor die saak in die hof moes voorkom, is ‘n skikking buite die hof met Russell en die Feike Raadgewers aangegaan.
18 Januarie 2011
