Die Tlokwe-munisipaliteit is onlangs met behulp van die Afrika-sentrum vir Rampstudies aan die Noordwes-universiteit se Potchefstroom-kampus tot rampgebied verklaar.
Dit volg ná duisende hektare en vee tydens brande in Augustus in dié omgewing in die slag gebly het.
Luidens ’n verklaring is dit die eerste keer in die geskiedenis dat ’n universiteit só leiding neem in ’n bedryfskwessie, én waar wetenskaplike kennis deel van die proses was.
Die sentrum werk die afgelope vyf jaar baie nou saam met die plaaslike en distriksmunisipaliteit. In dié geval is hulp verleen met betrekking tot die iinwerkingstelling van die Wet op Rampbestuur, asook om die nodige strukture gereed te kry.
Impak-asessering
Prof. Dewald van Niekerk, wat die hoof van die rampbestuurverslag was, sê ná die brande het hy die sentrum se dienste beskikbaar gestel om die impak-assessering so spoedig moontlik te doen. Van Niekerk is ook lid van die munisipaliteit se advieskomitee vir ramprisikobestuur.
“Deur gebruik te maak van data, soos satellietbeelde, kon ons ’n akkurate skatting doen wat die hele gebrande gebied betref. Ons kon dus die verliese soos deur die boere beskryf, met ons data korreleer.
"Verder is ons ook besig om die totale verliese binne die provinsie te konsolideer om ’n beter prentjie te kry van die hele situasie vir die brandtyd vanjaar,” verduidelik Van Niekerk.
Provinsiale vlak
Ná die oorhandiging van die verslag het die munisipaliteit ’n ramptoestand afgekondig. Volgens Van Niekerk lyk dit asof dié toestand tot provinsiale vlak opgegradeer sal word.
Intussen sê Noordwes se departement van landbou, omgewingsake en landelike ontwikkeling die proses rondom die rampstatus van die ander dele wat ook deur brande geraak is, is aan die gang. Dié gebiede sluit Vryburg, Lichtenburg, Schweizer-Renecke en Fochville in.
29 September 2011
