Kommer bestaan omdat die staat glo nie aan vereistes ten opsigte van brande voldoen nie, sê die TLU SA.
Hoewel die oorsaak van die verskeie verwoestende brande van verlede week tans ondersoek word, “kom al meer getuienis na vore dat die staat self nie voldoen aan alle vereistes wat aan grondbesitters gestel word rakende brande nie,” sê die organisasie in ’n verklaring.
Mnr. Louis Meintjies, ondervoorsitter, sê hulle vind dat die staat in baie gevalle geen voorbereidings op sy grond tref nie. “Baie brande ontstaan, hetsy moedswillig of nalatig, op padreserwes wat onder die beheer van die Regering is. Slegs in uitsonderlike gevalle is die padreserwes behoorlik voorberei vir die brandseisoen.”
Brandverenigings
Volgens Meintjies is hulle ook bekommerd oor die feit dat die Regering, wat verplig is om aan brandverenigings te behoort, nie daarby ingeskakel is nie. Hy sê tydens verlede week se kwaai brande was die staat se rampbestuursvermoë “hoogs ondoeltreffend” en in sommige streke het dit glo totaal ontbreek.
“Boere was dus uitsluitlik op hulself aangewese. Maar tog word van boere, wat nou alles verloor het, verwag om steeds belasting aan staatsinstellings te betaal terwyl daar geen hulp of diens was nie.” Meintjies meen dat dié saak spoedig aangepak moet word.
Meintjies moedig boere aan wat nog hulp nodig het, om hul streekkantore of die TLU SA se hoofkantoor te kontak. Hy bedank ook boere wat reeds begin het om hul medeboere met voerskenkings en dies meer by te staan.
Iemand anders se probleem
Intussen sê mnr. Malcolm Procter, die adjunkdirekteur van bos- en veldbrandtoesig by die Vrystaatse departement van landbou, bosbou en visserye, hulle is baie bekommerd oor ’n beweerde neiging wat na bewering veral onder opkomende boere voorkom.
“Baie boere brand tans vir vroeë weiding en baie keer brand hulle te midde van ongunstige weerstoestande. In sommige gevalle het ons dit ook al ondervind dat opkomende boere die veld aan die brand steek en iemand anders dan die brand moet blus.
"Daar is onlangs in die distrik Memel 4 600 ha afgebrand weens iemand wat die veld aan die brand gesteek het en gereken het iemand anders moet die brand maar blus.”
Procter sê hulle is baie bekommerd oor die voorkoms van brande in komende maande, aangesien 120 553 ha reeds vanjaar in die Vrystaat afgebrand het.
30 Augustus 2011
