Twee skrywers in die Landbouweekblad-stal is vir hul werk vereer: Hugo Lochner, redakteur van Landbouweekblad, en Glenneis Kriel, artikelredakteur van Farming SA, het dié eer te beurt geval.
Die toekennings is tydens Landbouskrywers SA se nasionale Boer van die Jaar-plegtigheid in Port Elizabeth gedoen.
Lochner is as die ProAgri-Forum se Landbouskrywer van die Jaar aangewys. Die ProAgri-Forum bestaan uit voormalige wenners van die Boer van die Jaar-toekenning. Die toekenning word toegeken aan ‘n lid van Landbouskrywers SA wat oor jare ‘n buitengewone bydrae gelewer het om die landbou te bevorder en om die positiewe sake in die landbou aan die publiek oor te dra.
Kriel, ‘n joernalis van Farming SA, ‘n publikasie in die die LBW-stal, is as Santam Landbou se Joernalis van die jaar aangewys. Sy skryf die afgelope dekade oor die landbou en het vroeër vanjaar die Izethulo-prys vir uitstaande joernalistiek in die vrugtebedryf ontvang.
Byskrif hieronder: Glenneis Kriel is saam met mnre. Hans van der Merwe (links), uitvoerende direkteur van Agri SA en lid van die Agri Securitas-trust, en Tobias Doyer (regs), uitvoerende hoof van Santam Landbou (borg).
Altesaam 32 inskrywings is van 11 joernaliste ontvang vir die Santam-toekenning ontvang. Die beoordelaars is ‘n paneel bestaane uit ‘n verteenwoordiger elk van Landbouskrywers SA, die borg en die Agri Securitas Trustfonds. Die prysgeld is R10 000 kontant en R5 000 vir ‘n kursus van eie keuse. Farming SA se redakteur, Malixole Gwatyu, is in die wolke oor die erkenning wat dié publikasie geniet as gevolg van hierdie prestasies “Farming SA is nou maar net ‘n bietjie meer as twee jaar oud. Hierdie erkenning wys ons dat ons op die regte pad is met ons fokus om praktiese toeganklike informasie oor te dra aan ons lesers,” het Gwatyu gesê. Die Oos-Kaap tak van Landbouskrywers SA het op dié gala-funksie mnr. Colyn Scheltema met 'n spesiale langdiens-toekenning vereer. Hy is 'n stigterslid van die Oos-Kaapse tak, wat in 1979 in die lewe geroep is en die enigste oorlewende stigterslid. Scheltema, was lank 'n voorligter by die Departement van Landbou en het ook twee boeke geskryf. In 1982 het “Benutbare struike in die Valleibosveld” die lig gesien en in 2007 het “Baviaanskloof stories” gevolg. Hierdie boek is ook later in Engels vertaal. Op die foto hieronder ontvang Scheltema sy toekenning van mnr. Kobus Crous, voorsitter van die Oos-Kaap tak van Landbouskrwers SA.
15 November 2010
