Mnr. Gavin Hudson, uitvoerende hoof van die suikerreus, verlaat boonop die beleërde maatskappy einde Februarie. Dié aankondiging verskyn in dieselfde verklaring wat vandag uitgereik is oor die uitstel van die bekendmaking van die sakereddingsplan.
Hudson het in 2019 by die groep aangesluit toe Tongaat Hulett reeds in die moeilikheid beland het weens rekenkundige onreëlmatighede. Die groep het toe al gesukkel om sy allemintige skuldlas van R11,7 miljard te delg.
Onder Hudson se leierskap het die groep reeds die skuld met R6,5 miljard verminder. Hy was ook aan die stuur van die groep se herstruktureringsplan, maar skuldeisers het verlede jaar teen die voorgestelde plan besluit. Tongaat Hulett het toe in Oktober vrywillig in sakeredding gegaan.
Die JSE het ook reeds verlede jaar Tongaat Hulett se aandeelverhandeling opgeskort.
Hoewel Hudson die groep verlaat, blyk dit die ander lede van sy span sal aanhou om saam met die sakeredders te werk.
“Die sakereddingsplan is goed op dreef, maar die bekendmaking daarvan word uitgestel omdat meer tyd nodig is vir die finalisering van komplekse werkverrigting,” luidens die verklaring.
Die sake-entiteite wat deur die sakeredding geraak word, sluit in Tongaat Hulett Developments, Tongaat Hulett Sugar South Africa en Voermol.
Die vereiste meerderheid krediteure het reeds ten gunste van die uitstel van die publikasiedatum gestem wat nou 28 Februarie is. Volgens vorige aanduidings sou die plan teen môre, 31 Januarie, bekend wees.
Finansiering
Die sakeredders het die afgelope maande onderhandel om finansiering te vind wat en in Desember kon finansiering vanaf die Nywerheidsontwikkelingskoöperasie (NOK) verkry word wat nodig is om voort te gaan met werksaamhede en nodige instandhouding van toerusting en meulens.
’n Konsortium suikerrietboere het reeds einde November ’n plan aan die sakeredders voorgelê om afdelings van die maatskappy, soos meulens en die voerafdeling, oor te neem. Die besluit hieroor is nog nie bekend gemaak nie.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
