Die land se tien beste Pinotages is bekend.
Die Pinotage Assosiasie gee elke jaar met die Absa Top 10 Pinotage-kompetisie erkenning aan die beste wyn wat van Suid-Afrika se eie egte kultivar gemaak word.
Vanjaar se kompetisie het uitstekende wyne met uiteenlopende style opgelewer. Die meeste wenwyne kom uit die Stellenbosch-streek.
Dit is Altydgedacht 2009, Anura Reserve 2008, Die Laan 2008, Fairview 2009, Flagstone Writer’s Block 2008, Kaapzicht Steytler 2007, Lyngrove Platinum 2008, Rijk’s Reserve 2006, Welbedacht 2008 en Wildekrans Barrel Selection 2008.
Mnr. Ernst Janovsky, hoof van Absa se Agri-Besigheid, sêPinotage vertel ‘n storie van ‘n Suid-Afrikaanse legende.
Mense het Pinotage 'opgetel'
“Dit is ‘n nie ‘n storie van glorie van die begin af nie, maar ‘n storie van mense wat Pinotage opgetel het en van ondergang gered het en oor tyd legendes geskep het.”
Pinotage het ‘n paar jaar gelede onder kritiek deurgeloop dat die wyn onaangename geure het. Sedertdien het wynmakers en wingerdboukundiges baie moeite gedoen om goeie Pinotages te skep.
“Ons behoort standbeelde op te rig vir die 200 lede van die Pinotage Assosiasie, want hulle gee meer aandag in die wingerde om vrugte van goeie gehalte te oes en maak aanpassings in hul kelderpraktyke om nie net lokettreffers te maak nie , maar wyne met klassieke balans,” het mnr. Beyers Truter, wat alom as Pinotage-baanbreker beskou word, gesê.
Ook die internasionale wynbeoordelaar en wynmeester, mnr. David Molyneux-Berry, het die Suid-Afrikaanse wynbedryf geloof vir die verbetering in standaard. Volgens hom was net drie van die 133 inskrywings nie op peil nie.
13 September 2010
