Die TNPA het onlangs aangekondig
dat ’n belegging van R9,1 miljard in hawe-infrastruktuur in Oos-Londen,
Gqeberha en Ngqura beoog word.
Vir die projek wat oor sewe jaar uitgevoer sal word, is R2,2 miljard aan die hawe in Mosselbaai, R8,4 miljard aan die hawe in Saldanha en R5,5 miljard aan die Kaapstadse hawe toegewys.
Gedurende die huidige boekjaar sal die TNPA kapitaalprojekte van R452 miljoen by hawens in die westelike streek van stapel stuur. Dit sluit in die opknapping van die sleephelling by Kaai 3 by die hawe in Mosselbaai waarvoor R10,2 miljoen begroot is.
By die hawe in Saldanha is reeds begin met onder meer die aankoop van ’n sleepboot, die oprigting van ’n grensheining en die voorsiening van grootmaat-elektrisiteit. Daar is R182 miljoen vir kapitaalprojekte vir dié hawe gedurende die huidige boekjaar begroot.
Die Kaapstadse hawe het die grootste begroting vir kapitaalprojekte wat gedurende die huidige boekjaar onderneem sal word. Die TNPA het R260 miljoen aan dié hawe toegewys vir onder meer die aankoop van ’n helikopter en die vervanging van twee sleepbote. Oor die volgende sewe jaar word beoog om die vraghouerterminaal te vergroot en tien hyskrane aan te koop.
Adv. Phyllis Difeto, die TNPA se uitvoerende beampte vir die westelike streek, sê sy is vol vertroue dat die verbetering van hawe-infrastruktuur verbeterde doeltreffendheid by hawens tot gevolg sal hê. Volgens haar word veral gekonsentreer op die afhandeling van kapitaalprojekte binne die beoogde tydperk en volgens die vasgestelde begroting. “Terwyl ons ons klem op die uitvoer van kapitaalprojekte verskerp, erken ons dat daar in die verlede onderbesteding was. Daarom het ons ’n nuwe benadering tot die afhandeling van projekte geneem, een wat sal verseker dat almal daarby betrek word.”
Verwelkom
Mnr. Christo van der Rheede, uitvoerende direkteur van Agri SA, sê die aankondiging is baie goeie nuus. Agri SA het die afgelope twee jaar insette oor probleme by hawens aan Transnet gelewer en het saam met die landbousakekamer Agbiz gewerk om doeltreffendheid by Suid-Afrikaanse hawens te verbeter.
“Ons is baie dankbaar dat ons deur opbouende gesprekke vir Transnet kon aanspoor om met daadwerklike oplossings vir tekortkominge by die hawens vorendag te kom. Ons is ook baie bly oor goeie aanstellings wat gemaak word.”
Mnr. Jannie Strydom, uitvoerende hoof van Agri Wes-Kaap, sê dié organisasie is dankbaar vir die prioritisering van die drie hawens, veral die Kaapstadse hawe waarvandaan 55% van Suid-Afrika se primêre landbouprodukte uitgevoer word.
“Ons provinsie is uiters divers ten opsigte van landbouvertakkings wat deurlopend doeltreffende hawe-infrastruktuur benodig wat optimaal funksioneer om sodoende produkte in die buiteland te kry. Agri Wes-Kaap is bemoedig deur die beoogde belegging in infrastruktuur by dié hawe en hoop dat die herposisionering die nodige kapasiteit sal skep om die potensiaal van landbou-uitvoer in die Wes-Kaap te ondersteun en uit te brei.”
