Die landbousektor, en spesifiek rooivleisprodusente, moet verantwoordelikheid neem en optree ten opsigte van kweekhuisgasse, sê die Rooivleisprodusente-organisasie.
Luidens ’n verklaring gaan nog lank oor bydraes tot die vrystelling van kweekhuisgasse gepraat en geredeneer word, veral ná die COP17-kongres in Durban.
“Dit is egter belangriker om verantwoordelikheid te aanvaar en woorde in dade om te skep. Die bul moet by die horings gepak word! Dit is presies waartoe die rooivleisbedryf hom in 2012 verbind.
"Die impak van klimaatsverandering is die mees drastiese op die landbou en natuurlike hulpbronne. Dit hou ernstige gevolge in vir veral Afrika suid van die Sahara ten opsigte van voedselsekerheid en proteïen-gebrekkige bevolkings,” lui die verklaring.
Statistiek
Die organisasie sê veeboerdery is een van die landbou se hoofbydraers tot die vrystelling van kweekhuisgasse. Dié bedryf is verantwoordelik vir 90% van veevrystelling, en 65% van alle vrystelling deur die landboubedryf.
Volgens die jongste statistiek word 34 000 gigagram (Gg) koolstof per jaar deur die landbou vrygestel. Dié statistiek dui aan dat die landbou vir 8,5% van die totale vrystelling van kweekhuisgasse in die land verantwoordelik is en enteriese fermentasie vir 5,5%. Die wildbedryf se bydrae is vir die eerste keer by dié syfers ingereken.
Weglaatbaar?
Die organisasie meen dat dit maklik is om te redeneer dat ’n bydrae van tussen 5% en 8% weglaatbaar min is, “maar die leiers in die rooivleisbedryf reken dat alle bedrywe en alle landsburgers hulself daartoe behoort te verbind om die vrystelling van kweekhuisgasse te verminder.”
Wat die mobilisering van ’n totale bedryf in dié verband betref, sê die organisasie die Kode van Beste Praktyk wat reeds vir omgewingskwessies ontwikkel is, was ’n goeie beginpunt. Die kode is verlede jaar bekend gestel, en dit is saamgestel ná alle belanghebbendes geraadpleeg is.
“Daar word voorsien dat die rooivleisbedryf aanstaande jaar baie gaan leer, wat die bedryf sal help om sy probleme beter te hanteer,” aldus die RPO.
12 Desember 2011
