Die ouditverslag van ‘n moontlike omstrede tender vir trekkers in Mpumalanga moet geopenbaar word, sê die Demokratiese Alliansie (DA). ]
Luidens ‘n verklaring gaan die party vandag (13 Desember) in terme van die Wet op die Reg tot Toegang tot Inligting, ‘n aansoek hiervoor inhandig.
Dít volg na ‘n berig in die City Press dat Premier David Mabuza in 2008 ‘n tender van sowat R230 miljoen, om trekkers aan opkomende boere in Mpumalanga te verskaf, aan mnr. Patrick Chirwa, sy vriend en sakevennoot toegeken het.
Volgens die party is die tender glo goedgekeur sonder dat Mpumalanga se departement van landbou, grondhervorming en grondadministrasie dit beplan of daarvoor begroot het.
Verduidelik
Die DA sê Mabuza moet in duidelike terme verduidelik hoekom en hoe die tender toegeken is, én hoe dit glo aan ‘n vriend en sakevennoot toegestaan is.
Volgens die party bestaan verdere onduidelikhede. Die departement het aanvanklik glo aangedui dat besteding op die projek R150 miljoen moet wees. “Dit is dus nogal vreemd dat ‘n R230 miljoen-tender aan Sizwangendaba Investment toegeken is, terwyl ‘n ander aanbod R143 miljoen was,” lui die verklaring. Daarbenewens blyk dit dat die maatskappy nie ‘n trekkerhandelaar is nie.
Die departement het na bewering ‘n bedrag van R65,7 miljoen se oorbesteding in die 2008/’09 boekjaar aangeteken, aangesien dit nie vir dié bykomende uitgawe begroot het nie.
Omkopery?
Die DA sê hy vermoed alles in nie wel by dié provinsiale regering nie, aangesien Mabuza na bewering deur middel van mnr. Mabutho Sithole, sy woordvoerder, ‘n joernalis wou omkoop om oor die kwessie stil te bly.
Die party meen die premier moet ‘n verduideliking vir die situasie gee.
Mnr. Athol Trollip, die DA se parlementêre leier, gaan ook aan pres. Jacob Zuma skryf, en versoek dat hy moet optree indien die premier en ander beamptes binne die departement aan bedrog skuldig bevind sou word.
13 Desember 2010
