Trekkerverkope het in November met 5% gestyg, in vergelyking met die ooreenstemmende tydperk in 2009.
Mnr. Lane Reynolds, voorsitter van die SA Landboumasjienerie-assosiasie (SAAMA), sê 459 trekker-eenhede is in November 2009 verkoop, terwyl 483 eenhede verlede maand verkoop is. Die algemene verkope vir die jaar tot dusver is egter 10% laer as verkope oor dieselfde tydperk verlede jaar.
Stroperverkope, wat op 8 eenhede in November 2010 te staan gekom het, is egter aansienlik laer as die 13 eenhede wat in November 2009 verkoop is. In vergelyking met dieselfde tydperk in 2009 is vir die jaar tot dusver sowat 36% minder stropers verkoop.
Bemoedigend
Reynolds sê trekkerverkope vir verlede maand was besonder bemoedigend, veral omdat die algemene somerreën so laat begin val het, en weens die verwagting dat 10% minder mielies dié seisoen aangeplant gaan word.
“Verkope van trekkers oor die algemeen en veral groter trekkers was redelik onderdruk in die gebiede waar mielies tradisioneel verbou word. Met die volgehoue sterk rand, bly dit ’n kopersmark en sommige boere gebruik die geleentheid om te belê in kapitaaltoerusting”, lui die verklaring.
Volgens SAAMA realiseer vroeëre voorspellings dat sowat 5000 trekkers in 2010 verkoop sal word.
6 Desember 2010
