Trekkerverkope van 582 eenhede is byna 16% hoër as die 502 eenhede wat verlede Augustus aangemeld is.
Verkope vir die agt maande van die jaar tot dusver is nou 5% laer as dieselfde tydperk verlede jaar, sê mnr. Wynn Dedwith, voorsitter van die SA Landboumasjinerie-assosiasie.
Stroperverkope van 25 eenhede in Augustus is aansienlik hoër as die 18 eenhede wat verlede Augustus verkoop is. Vir die jaar tot dusver is stroperverkope 4% laer as verkope vir die ooreenstemmende tydperk verlede jaar.
Dedwith sê die goeie verkope van toerusting in Augustus weerspieël die huidige optimisme in die bedryf. Hoewel mieliepryse die afgelope maande gedaal het, kyk boere nietemin na hulle kontantvloei voor die voorbereiding vir die somersaaityd wat voorlê. Korttermynvooruitsigte vir verkope van toerusting sal waarskynlik afhang van weerstoestande in September en Oktober, die tydperk voordat somergewasse aangeplant word.
Ramings in die bedryf is steeds dat die mark in 2014 tot 10% laer as verlede jaar sal wees.
