Die twee verdagtes van onderskeidelik 22 en 34 jaar oud is in die township Bohlokong net buite Bethlehem en sowat 46km van Kestell af in hegtenis geneem. ’n Windbuks en haelgeweer is in hul besit gevind, berig News24.
Mnr. Alheit Smit het Vrydagoggend op sy vrou se bebloede lyk in hul slaapkamer afgekom nadat hy onraad vermoed het toe hy haar bakkie langs die pad sien staan en sy nie haar selfoon geantwoord het nie.
Die polisie het aan Rapport gesê daar was lyke die hele huis vol, in die kombuis, sitkamer, badkamers en slaapkamers. Rudi is glo in die bad verdrink en dit wil voorkom of die aanvallers sy ma gedwing het om die kluis oop te sluit. Die slagoffers, waaronder ook mee. Lerato Moloi, Mothoduwa Moloi, Nomasonto Zulu, Nokufa Monareng en Nomasutsa Moduma, se lyke kon eers Saterdagoggend verwyder word nadat die polisie se forensiese span deur die nag gewerk het om bewysstukke in te samel.
Die twee verdagtes sal Maandag in die landdroshof op Kestell op aanklagte van moord, gewapende roof en die onwettige besit van vuurwapens verskyn. Brig. Mothantsi Makhele het aan News24 gesê van hierdie wapens is moontlik in die aanval gebruik, maar dat daar ook messteekwonde aan van die slagoffers was.
Dit is nog nie duidelik hoeveel aanvallers daar was nie, maar Mankele sê dit wil voorkom of die motief roof was. “Dit is een van daardie gevalle waar mense die huis bestorm en betree het met die doel om te roof,” het hy aan News24 gesê.
