Die hoeveelheid voedsel wat tans geproduseer word om die wêreld oor die volgende 50 jaar te voed, is meer as die hoeveelheid voedsel wat sedert die 1500’s verbruik is.
Mnr. Ernst Janovsky, hoof van Absa Agribesigheid, sê dít is een van die grootste uitdagings wat die landbou tans in die gesig staar.
Hy het op ’n mediageselligheid in Johannesburg gesê die prys van graanvoedsel het reeds begin styg weens die droogte in Amerika en die druk wat ’n groeiende vraag in ontwikkelende ekonomieë en die gebruik van graan vir biobrandstof op graanvoorrade het. Janovsky verwag dat produksievolumes in intensiewe veebedrywe weens die dalende graanvoorrade ook sal afneem.
Volgens Janovsky sal dié situasie lei tot ’n styging van tussen 12% en 15% in voedselinflasie in die volgende ses tot agt maande.
Bekostigbaarheid
Wat die bekostigbaarheid van voedsel betref, sê Janovsky: “Die tyd vir goedkoop kos is iets van die verlede.” Hy sê daar is altyd ’n spel tussen bekostigbaarheid en beskikbaarheid. As voedsel te goedkoop word, sal boere nie kan oorleef nie en produksie afneem. “Die teenoorgestelde is ook waar, dus lei dit tot ’n fokus op beleide om landbouproduksie te stimuleer.”
Sowat 60% van die wêreldbevolking leef tans in stede, en Janovsky sê voedselsekerheid sal derhalwe nie deur bestaansboerdery bereik kan word nie. Hy sê boere sal meer gekommersialiseerd moet word, veral in ontwikkelende lande waar die vraag na voedsel styg.
“Maar die goeie nuus is dat die landboubedryf die vermoë het om dié uitdagings die hoof te bied, want daar is genoeg reserwekapasiteit in Afrika en Suid-Amerika om meer voedsel te produseer,” aldus Janovsky.
