Suid-Afrikaanse rooivleis staan aan die vooraand van ’n omwenteling wat verreikende gevolge vir dié bedryf inhou.
Dr. Michael Bradfield, hoof van Breedplan Suider-Afrika, het op ’n werkswinkel van die Rooivleisbedryfsforum in Pretoria gesê geweldige geleenthede bestaan vir die rooivleisbedryf om hoë-gehalte snitte uit te voer.
“Op internasionale vlak is ’n groot leemte vir hoë-gehalte snitte en Suid-Afrika is in die posisie om dit te doen. Dit sal egter ’n gesamentlike poging van die hele bedryf verg om plaaslike rooivleis suksesvol as rolspeler in die internasionale mark te vestig,” het hy gesê.
Faktore wat aandag kort
Bradfield sê van die mees belangrike kwessies wat aandag moet kry alvorens Suid-Afrika as uitvoerder in die internasionale mark betrokke kan raak, is biosekuriteit, naspeurbaarheid en ’n verandering in die manier waarop rooivleis gegradeer word. “Die dieregesondheidstatus van plaaslike rooivleis is in ’n kritieke toestand en dit moet, tesame met naspeurbaarheid, opgegradeer word,” het hy gesê.
Mnr. Senzeni Zokwana, Minister van Landbou, Bosbou en Visserye, het op die werkswinkel gesê die sukses van die veebedryf, soos gesien as bydrae tot die BBP, kan grootliks toegeskryf word aan die kommersialisering en intensifisering van die bedryf om omset en wins te verhoog. “Hierdie stelsels is vergelykbaar met van die beste ter wêreld,” het hy bygevoeg.
Sal Regering se hulp benodig
Zokwana het gesê dat dit beklemtoon dat al die rolspelers binne die rooivleisbedryf die Regering se hulp nodig sal hê om in die globale omgewing mededingend te wees. “Deur ontwikkelde lande as model te gebruik, kan die Regering en die private sektor saam doelwitte opstel om mededingendheid te verbeter en produksie te bevorder,” het hy gesê.
Met verwysing na Suid-Afrika as internasionale rolspeler in rooivleisproduksie het die minister gesê plaaslike, sowel as relevante wêreldkwessies, moet in ag geneem word. “Afgesien van produksie is dieregesondheid een van hierdie kwessies wat groot aandag moet geniet, veral waar dit potensiële kopers betref. Daar sal dus stappe geneem moet word om te verseker dat Suid-Afrika se dieregesondheidstatus op ’n hoë standaard bly,” het hy gesê.
Globale uitvoerder van rooivleis
Mnr. Don Heatley, voormalige voorsitter van Meat and Livestock Australia, het met Bradfield saamgestem en gesê dit verg ’n geweldige hoeveelheid dissipline om ’n globale uitvoerder van rooivleis te word, en nog meer dissipline om een te bly.
“Suid-Afrika sal daarop moet fokus om sy eie storie te vertel as deel van sy bemarkingsplan, maar meer nog, om te verseker dat die gehalte van plaaslike rooivleis elke keer gewaarborg kan word.”
Heatley het benadruk dat die grootste fokus op die verbruiker moet wees. “Die verbruiker is die bron waaruit die rooivleisbedryf sy waarde put. Daarom moet die verbruiker die heel tyd in die bedryf se gedagtes wees,” het hy gesê.
