Met die talle landbou-organisasies wat reeds in Suid-Afrika bestaan, wil nóg ‘n organisasie, die United South African Agricultural Association (USAAA) sy vlerke weier sprei.
USAAA het ‘n verklaring uitgereik dat hy van plan is om sy bedrywighede, ná drie bestaansjare in die Wes-Kaap, na die res van die land uit te brei.
Mnr. Ismail Motala, ‘n woordvoerder, sê die organisasie verteenwoordig tans sowat 3800 lede in dié provinsie. “Sowat 70% van die swart boere in die provinsie behoort tot ons organisasie, en van die wit kommersiële boere het ook by ons begin aansluit.”
Volgens Motala het die organisasie besluit om eers sy ledegetalle en organisatoriese bedrywighede te stabiliseer voordat hy na die res van die land uitbrei. “Derhalwe het ons die uitbreiding drie jaar ná ons bestaan eers onderneem.”
Transformasie
Luidens ‘n verklaring sê die organisasie hy staan aan die voorpunt van transformasie binne die landbousektor. “Ons (swart boere) boere is al vir té lank buite in die koue gelaat en het geen gekoördineerde stem gehad wat die transformasie van die landbou kon bestuur nie.”
Volgens Motala wil hulle nie net op swart bestaansboere fokus nie, maar op die totale bedryf in sy geheel. “Ons meen Suid-Afrika het ‘n organisasie nodig wat alle boere, kommersiëel, kleinboere en bestaansboere, as ‘n eenheid kan verteenwoordig en die bedryf in die land bevorder.”
Motala sê die organisasie se bestuur is tans besig om sowat 600 boere in die Noord-Kaap te besoek. USAAA is ook genooi om boere in die Oos-Kaap te besoek. “Ons is van plan om boere in elke provinsie in die land te besoek, en ons behoort teen vroeg volgende jaar klaar te wees.”
20 September 2011
