Die optog vorm deel van Agri Noord-Kaap se beurtkrag-bewusmakingsveldtog wat onlangs in Douglas en Prieska begin het.
Me. Christelle Stoman, bestuurder van die Vaalharts-distrikslandbou-unie, sê die Vaalhartsboere verbou deur die jaar ’n verskeidenheid gewasse en die gebied kan as een van die Noord-Kaap se kosmandjies beskou word. Hulle besef beurtkrag raak almal, maar ervaar dat dit ’n rampspoedige uitwerking op die landbou het.
“Besproeiingsboere kan nie deur hul watertoedieningskedules kom nie en oeste ly daaronder. Boonop gaan noodsaaklike besproeiingswater verlore aangesien dit nie gepomp kan word nie.”
Sy sê boere word ook genoodsaak om in duurder tye hul besproeiingstelsels te laat loop. Dit, tesame met diegene wat van kragopwekkers gebruik moet maak, dra by tot reeds hemelhoë insetkoste.
Die distrikslandbou-unie is bekommerd oor die komende oesseisoen met pakhuise en verwerkingsaanlegte wat móét werk en kontrakte wat nagekom moet word. “Beurtkrag stuur nou meer as voorheen op ’n groot ramp af. Vaalharts se boere voeg vandag hul stem by duisende ander landwyd.”
Vaalharts maak voorstelle vir alternatiewe
Sy het hul versoeke aan Eskom en die regering soos volg opgesom:
• Gee meer krag aan die besproeiingsbedryf of verminder die beurtkragfases,
• Verskuif hoëkoste-spitstye na die “af tye”,
• Gee ’n alternatief vir duur Ruraflextariewe,
• Koppel sonplase in die landbousektor en kragopwekkingstelsels wat nie aan die netwerk gekoppel is nie, aan Eskom se netwerk,
• Vergemaklik die aansoekproses vir hernubare energieplase en ander alternatiewe, en
• Bied hoër kortings op diesel en brandstof vir elektrisiteitsopwekking aan.
Landboubesighede maak ook stem dik
Senwes, die landboudienstemaatskappy, het sy steun aan die boere toegesê deur middel van ’n verklaring deur mnr. Francois Strydom, uitvoerende hoof, wat by die optog voorgehou is.
“As die wiele van die trekkers en ander plaasvoertuie wat jy vandag hier om jou sien, as gevolg van die voortslepende kragkrisis en onvoorspelbare beurtkragskedules tot ’n stilstand kners, gaan dit méér as net die landbouwaardeketting wees wat daaronder sal ly. Elke Suid-Afrikaner sal dit aan sy sak en sy leë koskas voel.”
Strydom, wat ook die voorsitter van Agbiz is, sê al die saamtrekke moet as ’n opbouende gebaar gesien word.
“Die kruks van die saak is dat elektrisiteit dringend nodig is om oeste te red en om te verseker dat voedselsekerheid beskerm word.”
Volgens hom is die stelling wat op Douglas gemaak is dat “krag kos is en kos krag is”, as’t ware ’n noodkreet vir die landbousektor in dié tyd.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
