Die polisie en verskeie veiligheidsorganisasies is op die spoor van nóg verdagtes wat vermoedelik betrokke was by die moorde op renosterboer mnr. Piet van Zyl en sy vrou, Tilla.
Volgens mnr. Marius Müller, Afriforum se nasionale operasionele koördineerder , het die Heritage Protection Group (HPG) en Qiniso Lonke die Limpopo- en Mpumalanga-polisie bygestaan in die ondersoek wat tot die arrestasie van agt verdagtes gelei het. Afriforum was ook betrokke by die ondersoek. Ses van die verdagtes is naby Hazyview gearresteer, met 'n sewende by Naboomspruit. Die agtste verdagte is by Lenasia gearresteer.
LEES OOK: Renosterboer, vrou vermoor in plaasaanval
Piet van Zyl was 'n bekende renosterboer van Mokopane en is op 20 Augustus op sy plaas in die Immerpan-omgewing vermoor. Beide Piet en Tilla is met 'n 9mm pistool geskiet. Van Zyl het sy renosters teen groot koste teen stropers beskerm maar het steeds gereeld onder stropery deurgeloop.
Müller het 'n pleidooi aan die publiek gelewer om betrokke te raak by gemeenskapsbeveiliging.
“Mense moet regtig begin betrokke en bewus raak van veiligheid. Raak betrokke by 'n veiligheidstruktuur in jou gemeenskap, of jy op 'n plaas, kleinhoewe of op die dorp bly. Dit maak nie saak watter organisasie dit bestuur nie. Raak betrokke sodat jy op 'n stelsel is wat jy kan aktiveer sou jy aangeval word.”
