Dr. Douw Grobler, ’n veearts en bekende in wildbewaringskringe, het in die hof verskyn op aanklagte wat glo verband hou met renosterstropery.
Grobler, wat jare lank aan die Krugerwildtuin verbonde was waar hy ook vir wildvangste verantwoordelik was, het saam met sewe ander mans in die Pretoria-Noord-landdroshof verskyn op verskeie aanklagte in dié verband.
Dit sluit in die onwettige besit van wapens en die verspreiding van dieremedikasie en -verdowingsmiddels wat in wildvang gebruik word. Me. Wanda Mkutshulwa, hoof van kommunikasie by SANParke, wou nie daarop kommentaar lewer nie.
“Grobler is al langer as nege jaar gelede by die wildtuin afgedank. Ons weet nie veel van sy doen en late nie,” het sy gesê. Die saak is tot 28 Februarie uitgestel.
Nóg beskuldigdes
Twee veeartse van Modimolle, drr. Karel Toet en Manie du Plessis, het vroeër saam met mnr. Dawie Groenewald, grootwildjagter en wildplaaseienaar, en ander beskuldigdes op klagte van beweerde renosterstropery in die hof op Musina verskyn.
Dr. André Uys van Thabazimbi is in Januarie vanjaar op soortgelyke klagte in hegtenis geneem. Die klagte teen hom is egter in die hof op Louis Trichardt teruggetrek en hy gaan as staatsgetuie optree.
Honderde renosters gestroop
Volgens SANParke is 405 renosters tot dusver vanjaar gestroop en 210 stropers is in verband daarmee in hegtenis geneem. Dit is 21,6% meer as die 333 gestroopte renosters en 27,3% meer as die 165 inhegtenisnemings verlede jaar.
Die Krugerwildtuin, Limpopo en Kwa- Zulu-Natal is die swaarste getref. Volgens die dagblad Beeld is 165 van die verdagtes vanjaar in Mpumalanga aangekeer waarvan slegs 18 steeds agter tralies is. Die res is almal op borgtog.
13 Desember 2011
