Hoewel die polisiediens en veediefstaleenhede nie die vermoë om veediefstal te bekamp nie, durf boere nie klippe gooi as hulle eie huis nie in orde is nie, waarsku mnr. Jacques Swanepoel, voorsitter van Noordwes RPO se veediefstalforum.
Swanepoel, wat ook tot NWRPO se onder-voorsitter herkies is, het by die organisasie se jaarkongres gesê naas predatore het veediefstal die grootste bedreiging vir veeboere in die provinsie geword.
Hy het na nasionale statistiek verwys wat aantoon dat veediefstal geensins afneem nie. Sedert 2006 word jaarliks sowat 60 000 beeste gesteel waarvan net sowat 40% terug gevind word.
Die verlies is sowat R263 miljoen. Skaapdiefstal het in dié tydperk van 80 000 tot 90 000 vermeerder en bokke bly tussen 30 000 en 40 000 jaarliks. Hy sê wat die prentjie nog erger maak is dat die nie-rapportering van veediefstal in die prentjie tot so hoog as 37% kan wees.
Het boere geroskam
Swanepoel het boere geroskam wat nie gehoor gee aan wetgewing oor die brandmerk en identifikasie van vee nie. Hy sê dit maak dit baie moeiliker om misdaad te bekamp. Daar word gepraat van ’n syfer van net 27% van vee in Noordwes wat gebrandmerk is. “Ek neem dit met ’n knippie sout, maar al is dit twee keer soveel is daar steeds ver te veel ongeidentifiseerde diere.”
Hy is egter ook bekommerd oor die registrasieproses. “Daar is tans sowat 37 000 kommersiële veeprodusente en dit is kommerwekkend dat die registrateur bykans 475 000 geregistreerde brandmerke op rekord het. Hoeveel van daardie brandmerke is nie op name van veediewe en sindikate wat aktief by veediefstal betrokke is nie? Hierdie register sal dringend nagegaan moet word.”
Volgens hom is die grootste probleme met die bekamping van veediefstal gesindhede en gebrekkige kommunikasie. Dan is daar ook ’n kultuur van swak dienslewering, verontagsaming van wetgewing, gebrekkige vertrouensverhoudings, onkundigheid en logistieke probleme.
Mnr. Jaco Maré, voorsitter van die Nasionale Veediefstalforum, het ’n vurige pleitdooi gelewer dat veediefstal met net soveel erns as renosterstropery in die media hanteer moet word. Ons het die grootste simpatie met renosterboere, maar ons probleem, wat geldelik groter in omvang s, verdien net soveel erkenning en publisiteit.
23 Mei 2102
