Veediefstal gaan in ’n operasie van twee maande lank met mag en mening deur die SA Polisiediens gepak word.
Die belangrikste doelwit is die voorkoming van misdaad. Indien dit die verlangde resultate bereik, sal die projek landwyd ingeskakel word by die polisie se landelike beveiligingstrategie.
Nasionale strategie
Volgens brig. Judy le Roux, koordineerder van die nasionale landelike veiligheidstrategie, is dit ’n geïntegreerde operasie waarvoor die totale vermoë van die SAPD ingespan gaan word.
Die nasionale vervolgingsgesag word ook betrek. Die eerste groep reaksiemaglede wat reeds ingevolge die landelike beveiligingstrategie opleiding ondergaan het, sal met dié operasie getoets word. Die operasie gaan in die Vrystaat en Oos-Kaap van stapel gestuur word.
Ná twee maande sal die proses beoordeel word, waarna dit waarskynlik na die res van die land uitgebrei sal word, sê sy. “Die SAPD is absoluut ernstig met landelike beveiliging en ons sien reeds die resultate. Van nou af sal die verskil gemeet kan word.”
Sy sê klagte dat die strategie nie op kantoorvlak uitkom waar dit moet nie, verbaas haar want terugvoer uit gemeenskappe is gunstig. “Ons kan nie aandag gee aan algemene klagte nie.
Bevorder landelike beveiliging
As spesifieke insidente egter onder ons aandag gebring word, kry dit aandag en word planne opgestel om probleme op te los.” Le Roux sê daar is verskeie plekke waar sulke klagte aangemeld kan word en die publiek word aangemoedig om dit te gebruik omdat dit landelike beveiliging bevorder.
Landwye besoeke om die implementering van die veiligheidstrategie te beoordeel, sal teen Maart afgehandel word. Verteenwoordigers van alle rolspelers sal oor die besoeke ingelig word en tydens vergaderings kans kry om hul menings te lug.
Waar probleme voorkom, sal dit tydens besoeke aandag kry, sê sy. Die dokument Identifikasie van Diere kan op die Departement van Landbou se webblad www.daff.gov.za bekyk word. Klik hier om die dokument te besigtig.
Daarin word onder meer die voordele van wettige merke, hoe om ’n identifikasiemerk te registreer en pligte van eienaars bespreek.
6 Februarie 2012
