Die hoë voorkoms van veediefstal kan ook voor die deur van die veebedryf gelê word.
Mnr. Jaco Maré, voorsitter van die nasionale forum vir die voorkoming van veediefstal, sê die uitwerking van veediefstal op die volhoubaarheid van veeboerdery is baie ernstig in die meeste provinsies.
Gemiddeld 30 000 veediefstalsake bedrae van altesaam R750 miljoen per jaar is die afgelope vyf jaar aangemeld. “Met so baie geld uit jou beursie, is dit verstaanbaar dat produsente ’n gevoel van magteloosheid ervaar en soms wonder of hulle moet voortgaan om te boer,” sê hy.
Volgens hom gee die grootste deel van die veehandel nie gehoor aan die bepalings van die Wet op die Identifikasie van Diere en die Wet op Veediefstal, wat beweging beheer nie, en voldoen dus nie aan die basiese vereistes om veediefstal te bekamp nie.
“Hierdie euwel het ’n verlammende uitwerking op sowel die kommersiële as die opkomende boere in die land. Die veediefstaleenhede kan dié misdaad nie alleen bestry nie en lede van die veebedryf wat nie die betrokke wetgewing nakom en hul vee merk nie, dra by tot die voorkoms van die diefstal.”
In die tydperk 1 April 2013 tot 31 Maart 2014 is altesaam 56 954 beeste met ’n waarde van R592 321 600 as gesteel aangemeld. Daarvan is 22 070 teruggevind, wat beteken dat 34 884 beeste met ’n waarde van R363 793 600 verlore gegaan het.
In die geval van skape is 79 713 skape van altesaam R135 512 100 in dié verslag tydperk gesteel. Altesaam 16 663 hiervan is teruggevind. Die totale verlies was dus 63 050 skape met ’n waarde van R107 185 000.
Wat bokke betref is 34 988 (altesaam R68 226 600) in dieselfde tydperk gesteel. Hiervan is 10 600 teruggevind, dus was daar ‘n verlies van 24 388 bokke met ’n kontantwaarde van R47 556 600.
Die volgende tien polisiekantore is as brandpunt-gebiede uitgewys: Maluti in die Oos-Kaap, Ladysmith in KwaZulu-Natal, Qumbu in die Oos-Kaap, Bulwer in KwaZulu-Natal, Mthatha in die Oos-Kaap, Sulenkama in die Oos-kaap, Amersfoort in Mpumalanga, Utrecht in KwaZulu-Natal, Bergville in KwaZulu-Natal en Harrismith in die Vrystaat.
Maré het ’n beroep gedoen dat produsente alle vee ingevolge die wet met ’n tatoeëer- of brandmerk merk, volledige rekord van alle identifikasiedokumente en verwyderingsertifikate asook veeregister byhou, alle veediefstalvoorvalle onmiddellik by die polisie aanmeld , en aktief by ondersoeke in die bekamping van veediefstal betrokke raak.
Klik net op aangehegte grafika om te vergroot.
