Dit is beter om gesonde diere gesond te probeer hou as om siek diere gesond te probeer maak, het dr. Dave Midgley, veearts en veekonsultant, op die Landboukorrels-boeredag naby Cullinan gesê.
“Voorkomende dieregesondheid is soos om jou tande te borsel, want dit voorkom gaatjies óf om jou voertuig tydig te diens om dit padwaardig te hou. Boere wag gewoonlik tot hul vee siek is. Dan probeer hulle die diere self dokter en as dit laat is, laat kom hulle die veearts. As die veearts dan niks regkry nie, is hy ’n slegte veearts.”
Hy sê die ideaal is dat koeie vroeg kalf, want die baarmoeder het 42 dae nodig om te herstel. Daar moet ook skoon en higiënies gewerk word om besmetting van die baarmoeder te probeer voorkom. As die koeie vroeg kalf, verbeter dit die volgende kalfpersentasie.
Dr. Hinner Köster, direkteur van Animate Animal Health, het gesê dit is belangrik dat koeie in ’n redelike kondisie moet wees as hulle kalf, anders sal die jong kalf te min melk kry vir goeie, gesonde groei en sal dit langer duur voor die koei weer dragtig word.
Volgens hom is dit goedkoper om ’n droë, dragtige koei se kondisie deur die winter te handhaaf as sy nie ’n kalf het nie as om haar terug te kry na optimale kondisie wanneer sy teen die einde van die winter gekalf het.
“Speenkalfprodusente wil probeer spaar op ’n lekaanvulling in die winter, maar die koste weens die verlies aan produksie en reproduksie weens suboptimale liggaamskondisie aan die einde van die winter is heelwat meer as die koste van ’n goeie lek om die koeie se kondisie te handhaaf.”
