Dieregesondheid is ‘n voorkeur vir die Regering, veral omdat klimaatsverandering tot die uitbraak van nuwe peste en siektes gelei het, wat andersins nie die geval sou wees nie, sê dr. Pieter Mulder, adjunk-minister van Landbou, Bosbou en Visserye.
Luidens ‘n verklaring het hy dié opmerking tydens die OIE (Office International des Epizooties) se nasionale raadseminaar in Kempton Park gemaak. Die organisasie is verantwoordelik vir die verbetering van dieregesondheid wêreldwyd, en Suid-Afrika was een van die stigterslede in 1924.
Miljoene vir navorsing
Volgens Mulder is dieregesondheid belangrik, aangesien diere ‘n groot bron van voedsel vir die mens is. Derhalwe het die Regering ‘n bedrag van R205 miljoen bewillig vir navorsing en ontwikkeling van hoë gehalte veeartsenykundige produkte deur middel van die Landbounavorsingsraad (LNR).
“Afrikalande het nodig om saam te staan om hoë gehalte veeartsenykundige medisyne te produseer, wat die behoeftes van die Afrika-kontinent kan aanspreek”, lui die verklaring.
Groeiende bevolking
Die menslike bevolking het sedert 1960 verdubbel, wat ‘n verhoogde aanvraag na vleis, melk en vis gaan veroorsaak, wat weer gevare vir verbruikers kan inhou. Dit kan lei tot verhoogde infeksies rakende dieresiektes onder mense, derhalwe is toegang tot hoë gehalte veeartsenykundige baie nodig.
Volgens Mulder plaas dit ‘n groot verantwoordelikheid op die OIE om te sorg dat die medisyne wat geproduseer word vir registrasie, goedkoper is sodat boere dit kan bekostig. Opleiding oor die juiste gebruik van die medisyne is ook nodig.
26 November 2010
