Suid van Swellendam, in die Malgas/Napky-gebied, het boere ‘n tweede moeilike jaar agter die rug. Nadat die lae koringprys verlede jaar hul inkomste geknou het, is die graanopbrengs vanjaar swak nadat hulle net die helfte van hul normale winterreën gekry het.
(Die Malgas/Napky gebied is die gebied aan beide kante van die Breërivier vanaf Swellendam tot by Potberg met die Middel-Ruens aan weerskante daarvan.)
Mnr. Joos Badenhorst van die plaas Langvlei sê hy het van April tot September net 90mm reën gekry. In die belangrike maande van Augustus en September het hy maar 7mm en mm reën gemeet. Hoewel die opbrengste van 0,6 t/ha koring, 0,3 t/ha gars en 0,8 t/ha kanola laag is, is dit “verbasend” gegewe die omstandighede wat gedurende die groeiseisoen geheers het.
Die lae opbrengs plaas sy graan-inkomste opnuut onder druk, veral omdat die koringprys verlede jaar, toe hy ‘n normale oes van 1,5 t/ha behaal het, so laag was. Noudat die prys beter is, het hy min koring om te verkoop, en sal hy weer eens nie sy produksiekoste kan verhaal nie.
Met die goeie vleispryse wat vanjaar heers, moes die boerdery vanjaar swaar op die skaapvertakking steun. Badenhorst, wat sy skape van Februarie tot Oktober moes voer, is dankbaar vir die 62mm reën wat hulle in Oktober en 12mm wat hulle in November gekry het, wat beteken dat hy nie meer hoef voer te gee nie. “Die lusern is mooi en hier is nou kos vir ‘n vale, maar dié reën het nie die graan-oes beïnvloed nie.”
Badenhorst sê dat hulle vanjaar ook nie die wisselbouproewe wat onder leiding van prof. Mark Hardy, spesialisnavorser van die Wes-Kaapse departement van landbou, daar gedoen word, ge-oes het nie, maar besluit het om dit liewer in te kuil.
23 November 2010
