Die Suid-Afrikaanse Melkprosesseerdersorganisasie (Sampro) sê in ’n verslag die hoeveelheid langlewemelk wat verkoop is, het met 1,9% gestyg.
Verkope van vars en langlewemelk gesamentlik was 1,2% laer as in die vorige ooreenstemmende tydperk. Sowat 44% van die totale onverwerkte melk wat in Suid-Afrika geproduseer word, word vir vars en langlewemelk gebruik.
Sampro se verslag oor kleinhandelverkope en -pryse is gegrond op syfers van die onderneming NielsenIQ, wat kyk na kleinhandelverkope en -pryse van nege verskillende suiwelprodukte.
Van die nege het ses se verkope in die jaar tot Junie met van 0,7% tot 7,7% gedaal. Die ander drie s’n het met van 0,7% tot 1,9% gestyg.
Jogurt se verkope het met 5,5% gedaal, maas met 1,9% en room met 5%. Voorafverpakte kaas se verkope het met 1,5% gestyg.
Die pryse van al nege gemoniteerde produkte het in die jaar tot Junie 2022 gestyg. Die stygings was van 1,6% tot 6,8%.
Vars melk se prys het met 4,5% gestyg, langlewemelk met 6,8%, jogurt met 2,6%, voorafverpakte kaas met 4,4% en room met 6,7%.
Mnr. Alwyn Kraamwinkel, uitvoerende hoof van Sampro, sê in ’n ander verslag, wat oor die belangrikste markaanduiders in die melkbedryf tot die eerste week in September gaan, dat die vraag na die meeste suiwelprodukte swak is, hoewel kleinhandelpryse van dié produkte met minder as die inflasiekoers gestyg het.
Volgens hom word verbruikers se koopkrag deur stygings in geadministreerde en ander pryse, asook stadige ekonomiese groei weggekalwe.
In die eerste sewe maande van vanjaar was die produksie van onverwerkte melk laer as in die ooreenstemmende tydperke in al drie die vorige jare. Kraamwinkel wys op die ongunstige verhouding tussen die indekse vir voerpryse en vir produsentepryse van onverwerkte melk.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
