Verbruikers moet ingelig word oor wat binne die landbousektor gebeur en in watter posisie boere hulself bevind, sê mnr. Andries Theron, ondervoorsitter van Graan SA.
Hy sê dringende aandag moet gegee word aan die beeld wat verbruikers en die publiek oor graanboere en ander landbouprodusente het.
Theron was een van die sprekers tydens ‘n konferensie oor die mieliekrisis wat deur Solidariteit in Pretoria aangebied is.
Stygende voedselpryse nie boere se skuld
Volgens Theron kan die styging in byvoorbeeld die broodprys nie voor die deur van die produsent gelê word nie.
“Ons het die staat en die Kommissie vir Internasionale Handelsadministrasie (Itac) gevra vir ‘n koringtarief van R260 per ton, maar hulle wou dit nie instel nie. Slegs sowat 53% van die land se koringbehoeftes kon toe deur plaaslike aanbod bevredig word en 47% moes ingevoer word. En dít lei tot stygings in die broodprys. Dit kan dus voor die deur van die staat gelê word.”
“Tekorte kan kom”
Wat vanjaar se groot surplus mielies aanbetref sê Theron mielieboere moet gesamentlik optree en die helfte minder mielies aanplant vir die volgende seisoen as wat vanjaar die geval was as hulle finansieël wil oorleef.
“Ek vra soms vir myself, hoe ver het ons gekom as ons minder moet produseer - wat dalk ‘n tekort kan veroorsaak - om ‘n wins te kan maak sodat ons nie ondergaan nie en vir onsself kan sorg nie?“
Verbruikers se steun belangrik
Volgens Theron is verbruikers se steun vir die landbousektor baie belangrik. Hy sê verbruikers moet ingelig word en hulself inlig oor wat in die plaaslike en nasionale landbousektore aangaan.
Baie verbruikers weet tans daar is ‘n krisis wat mielies aanbetref, maar sommige verkeer onder die indruk dat die ooraanbod tot hul voordeel gaan strek omdat dit pryse gaan verlaag, vertel Theron. “Die ironie is verbruikers sien nie die voordeel van prysverlagings aan boere nie.”
Theron sê as verbruikers oor die ware situasie in die sektor ingelig word, kan die publiek hul mag as kiesers tot voordeel van die sektor gebruik. “Hulle kan byvoorbeeld die Regering dwing om infrastruktuur in stand te hou, wat produksie en gevolglik laer voedselpryse en voedselinflasie sal bevorder.”
30 Augustus 2010
