Mnr. Mark Winter, voorsitter van die Estcourt-boerevereniging, sê die aanval het op Vrydagaand 12 Augustus ná sononder plaasgevind.
Die man is na bewering op die werf oorval deur vier aanvallers wat agter ’n groot plaaswerktuig gewag het. Hulle het hom met ’n kapmes in die gesig gekap, sy hande vasgebind en terug in die huis gedwing.
Die vrou is in die huis oorval. Haar hande is ook vasgebind waarna die aanvallers na bewering vuurwapens en ander eiendom uit die huis gesteel en in een van die egpaar se voertuie gelaai het.
Winter sê terwyl die aanvallers deur die huis gegaan het, kon die vrou stilletjies haar eie hande en toe haar man se hande losmaak. “Een van die aanvallers het die man na die egpaar se slaapkamer begelei. Daar was ’n vuurwapen agter die gordyne in die slaapkamer versteek. Die man het dié vuurwapen gegryp en na bewering die aanvaller wat saam met hom was, doodgeskiet. Hy het toe nog skote afgevuur op die oorblywende aanvallers, wat op vlug geslaan het toe hulle die eerste skoot hoor.”
Nadat plaaslike veiligheidsowerhede in kennis gestel is, is die man vir sy besering behandel. Sy vrou is nie fisiek beseer nie.
Winter sê nadat daar lank geen plaasaanvalle in die distrik was nie, het dié boeregemeenskap die afgelope ses maande twee aanvalle beleef. Al die slagoffers was bejaard.
Hy sê hoewel hy verstaan dat wetsgehoorsame burgers nie in vestings wil woon nie en nie voortdurend paraat sou wees nie, is dit onwaarskynlik dat die bedreiging van plaasaanvalle en ander misdade ooit sal verdwyn. Mense kan nie bekostig om laks met hul veiligheidsmaatreëls en hul waaksaamheid te wees nie.
“Dit is kommerwekkend dat daar mense in ons boeregemeenskap is wat nog absoluut geen veiligheidsmaatreëls het nie. Ek het die liggaam van die dooie aanvaller gesien en dit was skrikwekkend om te sien hoe professioneel hy in gevegsuitrusting toegerus was. Hierdie ouens is baie goed voorbereid. Ons boeregemeenskap moet alles in sy vermoë doen om dit vir hierdie misdadigers so moeilik moontlik te maak om suksesvol te wees.”
Lt.kol. Nqobile Gwala, polisiewoordvoerder, sê speurders van die polisie op Estcourt ondersoek klagte van roof en probeer om die ander verdagtes op te spoor. Die oorledene is nog nie geïdentifiseer nie.
