Kol. Priscilla Naidu, polisiewoordvoerder, sê die derde verdagte was gedeeltelik in polisie-uniform geklee en die vierde in gewone kleredrag.
Naidu sê op Sondag 5 Februarie omstreeks 16:30 het die vier verdagtes die klokkie van die plaashuis gelui. Die boer het uitgekom en die verdagtes het hom ingelig dat die verdagte in gewone kleredrag kabels op sy plaas gesteel het.
Die verdagtes het die boer gevra om saam met hulle te gaan om ’n kanaal op sy plaas te inspekteer. Een van die verdagtes het agtergebly, terwyl die ander na die kanaal gegaan het.
Dié verdagte is na die plaashuis waar hy na bewering ’n vuurwapen op die boer se vrou gerig het en geld asook vuurwapens geëis het. Die ander verdagtes het intussen teruggekeer met die boer wat hulle na bewering in ’n boord op die plaas aangerand het.
Die egpaar is vasgebind en in ’n kamer toegesluit terwyl die verdagtes hul huis geplunder het. Agt jaggewere, twee ander vuurwapens, 100 patrone, ’n skootrekenaar, verkyker en selfone is gesteel. Die verdagtes het met die boer se Toyota Fortuner gevlug. Dit is later verlate sowat 20 km van die plaas af gevind.
Volgens Naidu is die gesteelde vuurwapens sowat R250 000 werd. ’n Saak van huisbraak word tans ondersoek.
“Die polisie versoek gemeenskappe om op die uitkyk te wees vir misdadigers wat hulle as polisiebeamptes voordoen. Elke polisiebeampte het ’n identifikasiekaart en naamwapen. As ’n burger mag jy vir identifikasie vra voor jy iemand op jou perseel toelaat.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
