’n Man wat glo op lede van ’n AfriForum-veiligheidstruktuur in die omgewing van Grootvlei-Oos naby Pretoria geskiet het, is in verband met ’n huisbraak in hegtenis geneem. Die lede het flink opgetree nadat hulle in kennis gestel is dat ’n huisalarm Donderdagaand op ’n plaas in die omgewing afgegaan het.
Luidens ’n verklaring sê die inwoner van die huis die draadheinings rondom sy eiendom was geknip en sy honde is vergiftig. Die verdagte is gevang ná die lede hom deur die veld sien hardloop het. Mnr. Johan Lucas, voorsitter van AfriForum se Grootvlei-Oos-tak, sê die man het skote afgevuur toe hulle hom aangekeer het.
In bosse weggekruip
Volgens Lucas het die verdagte aanvanklik weggekom, maar hy is later in die veld gevind waar hy glo weggekruip het. Die man het na bewering gesê hy het in die bosse gelê en slaap, maar sy skoenspore het ooreengestem met die spore wat by die geknipte heining gevind is. Hy het ook gif in sy besit gehad.
Lucas sê die Polisie het glo laat op die toneel aangekom, maar die verdagte is aan hulle oorhandig.
Mnr. Cornelius Jansen van Rensburg, die organisasie se woordvoerder vir gemeenskapsveiligheid, moedig landelike gemeenskappe aan om by veiligheidsinisiatiewe betrokke te raak.
“In die mate wat gemeenskappe in veral landelike gebiede nie op die Polisie kan staatmaak nie, moet ons onsself en ons gemeenskappe teen misdadigers beskerm.”
