Die verslag oor suur mynwater, wat deur die Regering se taakspan saamgestel is, is voltooi maar die dokument sal nie nou aan die publiek bekend gemaak word nie.
Me. Buyelwa Sonjica, Minister van Waterwese en Omgewingsake, en me. Susan Shabangu, Minister van Energie, het Donderdag (21 Oktober) met die taakspan vergader en die verslag bespreek.
Die ministers dien op ‘n interministeriële komitee oor die dreinering van suur mynwater, wat as die grootste enkele bedreiging vir die omgewing in Suid-Afrika beskryf word. Sonjica het die span aangestel nadat sy ‘n opdrag in dié verband van die Parlement ontvang het, lui ‘n berig op Business Report.
Nog oplossings
Volgens ‘n verklaring wat die ministers uitgereik het, het hulle na die vergadering die taakspan gevra om met meer oplossings vorendag te kom vir die betrokke probleme en om ook koste-implikasies te beplan.
Tydens ‘n opvolgvergadering sal “die pad vorentoe dan bepaal word. Verdere korrespondensie en die vrystelling van die verslag sal volg na die tweede vergadering met die kundiges”, lui die verklaring.
Die suur mynwater raak Gauteng, Mpumalanga, Noordwes en die Vrystaat. Groot kommer heers ook oor die beweerde stygende vlakke van suur mynwater onder Johannesburg.
25 Oktober 2010
