Hy het die Departement van Omgewingsake se verbintenis tot volhoubare benutting van natuurlewe as hulpbron vir Suid-Afrika se inwoners en opheffing van gemeenskappe as bemoedigend ervaar, het mnr. Wiaan van der Linde op die Wildbedryf SA-kongres by Polokwane in sy laaste toespraak as voorsitter gesê.
Van der Linde het besluit uit te tree as voorsitter vanweë gesondheidsredes. Hy het in sy openingstoespraak vertel hoe hy ná 'n ongeluk verlede jaar van voor af moes leer lees deur eers legkaarte te bou wat op sesjariges gemik is. "Om vandag hier te wees is meer as 'n eer, dis 'n wonderwerk," het hy gesê en bygevoeg dat sy persoonlike omstandighede saam met die droogte 2016 een van die moeilikste jare van sy lewe gemaak het.
Van der Linde sê een van die grootste uitdagings van sy tyd as voorsitter was om duidelike onderskeid tussen kommersiële wildboerdery en die bewaring van biodiversiteit in die bedryf te maak. "Ek het gedink dat ons 'n lang pad van hierdie doel weg is tot ek die Cites-vergadering in Sandton bygewoon het in September. Die Minister van Omgewingsake, me. Edna Molewa, verdien baie lof vir die manier waarop sy Suid-Afrika se belange in suidelike Afrika se natuurlike hulpbronne daar verteenwoordig het.
Huidige permitstelsel
"Een van die faktore wat groei in ons sektor beperk is die huidige permitstelsel omdat dit nie altyd maklik is vir staatsamptenare om onderskeid te maak tussen die reëls vir 'n bewaringsliggaam en die reëls vir 'n kommersiële boerdery nie, maar ek verseker julle – ons het die departement se steun al voel dit nie altyd so nie."
Van der Linde se tydperk as WRSA-voorsitter sal ook onthou word vir die stryd tussen lede wat wild as plaasvee onder die Departement van Landbou wil sien sorteer en wildboere wat glo wild en natuurlewe kan beter aan buitelanders bemark word onder die Departement van Omgewingsake.
Verbind tot transformasie
Die verskille ten spyt sê hy dit is nou noodsaaklik om 'n volledige waardeketting vir die wildbedryf daar te stel, want die moontlike voordele, soos werkgeleenthede, bydrae tot sosiale belegging en verbintenis tot transformasie het van onbetwisbare belang vir die bedryf geword.
"Kom ons word nie vasgevang deur die klein uitdagings en persoonlike verskille tussen ons nie, terwyl ons intern fokus, mis ons die groter uitdagings en ook geleenthede daar buite wat ons 100% fokus en energie elke dag verg."
Dr. Peter Oberem sal WRSA lei totdat in Oktober 'n nuwe voorsitter in Oktober gekies word.
